Võro instituudin näüdäti eelä “Mino Võromaa” 27. jutuvõistlusõ parõmbist töiest kokko pantut latsiraamatut “Tansaman ja parhilla'”. Üteliisi anti teedä’ konkursi võitja’.
Timahava võtsõ latsi ja nuuri võrokeelitside kirätöie võistlusõst ossa 124 kirotajat 128 tüüga. Parõmbit töid avit vällä valli’ hindajidõ kogo (Hollo Aimi, Laanpere Helle, Kübärä Merili ja Rahmani Jan).
Võistlusõ pääpreemiä pandsõ vällä Eesti eurosaadik, Võromaa miis Padari Ivari. Timä kutsõl sai võitja Koduvere Jolan Henriette kävvü Brüsselin europarlamendi ello kaeman.
Kokko sai raamatulõ “Tansaman ja parhilla’ ” 59 juttu-luulõtust, pildi’ tekk mano Võromaa juuriga kunstnik Vähi Laura.
Latsi ja nuuri võrokeelitside kirätöie võistlust alost 1987. aastagal Võro hariduskuundis. 2000. aastagast pääle kõrraldas võistlust Võro instituut.
“Mino Võromaa” 27. võistlusõ parõmba’ kirotaja’:
I – III klassi vannusõrühmän
I kotus – Rasmus Kärbla (Vilustõ PK)
II kotus – Iiris Aljes (Parksepä KK)
III kotus – Maia Serv (Osola PK)
IV-VI klassi vannusõrühmän
I kotus – Talis Timmi (Parksepä KK)
II kotus – Karl-Gustav Vaab (Haani K)
III kotus – Rudolf Pragi (Põlva ÜG)
VII-IX klassi vannusõrühmän
I kotus – Jolan Henriette Koduvere (Võro Kreutzwaldi G)
II kotus – Grethel Koddala (Vilustõ PK)
III kotus – Liis Kikas (Võro Kreutzwaldi G)
Kaile Kabun, Võro instituudi projektijuht